Marieddu domandat una cosa a su babbu
Su babbu: No mi tochis. Ma ita ti mancat ancora? Marieddu: Ti bolia pedì una cosa. Su babbu: Dai sbrigadì, ita bolis sciri? Marieddu: Est berus ca deu seu stètiu adotau? Su babbu: Ma lassamì perdi. Segundu tui, si ia dèpiu adotai unu pipieddu, iap’ai seberau pròpiu a unu coment’e tui? .........................................................................................................................................................Su generali est in su lettu morrendusì, acanta c’est sa pobidda
Su generali: Ormai seu morrendumì. Ma seu trint’annus chi ti ddu bolia domandai una cosa. Sa pobidda: Ita bolis sciri, seu pronta a ti donai custa sodisfatzioni. Su generali: Mi depis scoviai, cantu bortas m’ast traìsciu? Sa pobidda: T’apu postu is corrus scèti una borta. Su generali: Mancu mali. Ma si podit sciri cun chini? Sa pobidda: Certu, si ti fait prexeri. Su generali: Insandus dai, scoviamiddu ca seu curiosu. Sa pobidda: T’apu traìsciu una borta scèti, cun totu su batalioni tuu e basta. .............................................................................................................................................Ubertu est in giru fueddendi cun su gopai Gaudenziu
Gaudenziu: E insandus iat mi contas? Ubertu: E ita bolis chi ti conti. Gaudenziu: Nara, comenti andat cun pobidda tua? Ubertu: Mali. Meda mali. Gaudenziu: Po cali motivu andat mali? Ubertu: Po su motivu, ca no fait atru che mi fueddai de su primu pobiddu. Gaudenziu: Tontixeddu ses! E tui insandus fueddaddi de sa pròssima pobidda. Ca bis comenti ddi passat! .................................................................................................................................................Aurelianna est in tribunali interrogada de su giùdici
Su giùdici: Poita at pigau a stocadas a su connau? Aurelianna: M’est tocau amarolla, poita sa pistola s’est incepada! ..............................................................................................................................................Un omini incontrat in sa strada una picioca
S’omini: Scusit signora, at biu forsis calincunu Carabinieri innoi in giru? Sa picioca: Nossi. No dd’apu biu manc’unu. S’omini: (Boghendindi una pistola) Insandus donimì su borsellinu. Custa est una rapina! .........................................................................................................................................................Torquatu est a consultu aundi de unu magu
Su magu: Naramì poita ses beniu. Torquatu: Seu beniu fintzas a innoi, ca bollu a mi sciusciai una maledizioni chi portu asuba de tropu tempus. Su magu: Chi est chi ti dd’at fata? Torquatu: Mi dda fata unu predi, trint’annus fait. Su magu: Po ti ndi tirai custa cosa, mi depis nai is fueddus giustus chi su predi t’iat nau. Torquatu: Is fueddus fiant: “Vi dichiaro marito e moglie”! ......................................................................................................................................................Unu Cundannau a sa “sedia elettrica” est fueddendi cun su boia
Su boia: Est arribada s’ora de ti sei in cussa cadira, ses prontu? Su cundannau: Mancai no sia prontu tocat a essi prontu! Ma potzu esprimi s’ùltimu disìgiu? Su boia: Certu, custa est una richiesta legìtima e seus prontus a t’acuntentai. Su cundannau: Insandus ia boli fai una telefonada. Su boia: A chi depis telefonai? Su cundannau: Bollu telefonai a su diretori de s’Enel. Su Boia: E ita ddi depis nai? Su cundannau: A ndi stacai sa currenti de custa presoni po a su mancu una pariga de annus! ...................................................................................................................................................Cicciu est in visita aundi de su dietòlugu
Su dietòlugu: Balla, caru signor Cicciu, sa cosa est posta tropu mali. Cicciu: Poita, seu gravi meda? Su dietòlugu: E si! E si depit poni imediatamenti a dieta de oi e totu, depit perdi mìnimu coranta killus. Cicciu: Ge non est nudda! Nerimì insandus ita non potzu prus papai. Su dietòlugu: Duncas, po prima cosa depit fai dònnia dì ginnastica e in prus, depit eliminai de su papai, sa pasta, sa petza, is drucis, su pani, su latti, su burru, sa fruta sicada, su lardu, su sartitzu,is gelaus. Cicciu: Mi parrit ca si fait prus a lestru a mi nai ita depu papai. Su dietòlugu: Papit de totu, foras de su chi dd’apu nau a no papai. E elìminit puru is is cosas grassas. Cicciu: Insandus depu eliminai puru a pobidda mia. Finalmenti una bella cura! Su dietòlugu: Biu ca tenit gana de brullai. Ma castit ca seu fuedendi scèti de cosa de papai! Cicciu: Bho! Ge mi parrit ca insaras mi tocat a tzerriai su predi, po s’estrema untzioni! Su dietòlugu: Si ddu tzèrriat. Arracumandit a su predi de poni pagu ollu! .....................................................................................................................................................Bartolinu est cundannau a morti e su capitanu chi depit donai s’òrdini ddi domandat
Su capitanu: Prima de cumentzai s’esecutzioni, ddi donu sa possibilidadi de s’ultimu disìgiu. Bartolinu: Gràtzias. Fostei si ca est bravu! Su capitanu: Est una cosa giusta e seu prontu a ddi donai cantu disìgiat! Bartolinu: Ancora Gràtzias! S’ultimu dìsigiu miu, est ca m’iat a depi procurai unu libru scritu in Mandarinu. Su capitanu: Ma su Mandarinu est una fruta, miga unu libru. Bartolinu: Sissi, est una fruta, ma est puru una lìngua cinesa. Su capitanu: Apu cumprèndiu. E poita ddi serbit? Po ddu ligi luegus? Bartolinu: Sissi. Ma po ddu ligi oi e fintzas a candu non imparu a fueddai cussa lìngua! ....................................................................................................................................................Marieddu est torrau de scola e sa mamma bolit sciri comenti est andada sa letzioni
Sa mamma: E insaras Marieddu. Ita mi contas, naramì it’as studiau oi a scola. Marieddu: Oi, apu imparau medas fueddus nous chi no sciria. Sa mamma: Bellu. Comenti as fatu a ddus imparai? Marieddu: Apu postu una bella pariga de puntinas acutzas in sa cadira de su Maistu! ................................................................................................................................................................Dinu est in dd’una butega de pelletteria
Sa cumissa: In ita ddu potzu serbì? Dinu: M’iat a serbì unu bellu portafòliu de peddi. Sa cumissa: Comenti ddi praxit? Dinu: Dd’ia a boli tundu. Sa cumissa: Tundu? E poita ddu bolit aici? Dinu: Poita ci bollu arreguai is assènnius circolaris! .................................................................................................................................................Gianmarcu est in su lettu cun sa mulleri a pustis fatu s’amori
Gianmarco: As mai pensau ita si provat a essi un òmini? Sa mulleri: De no, e de su chi apu intèndiu prima, mi parrit mancu tui! .........................................................................................................................................................Marieddu domandat a su babbu
Marieddu: Babbu spiegamì una cosa, ca cras depu fai unu còmpitu in classi. Su babbu: Ita boli sciri? Marieddu: Aundi andant “gli uccelli migratori”? Su babbu: Andant in circa de un atras pobiddas! .......................................................................................................................................................Amalia est arreneghendi cun su pobiddu Giuliu
Amalia: Ma ita ses macu! Ma poita ses ponendudì su shampu in conca, candu seus bessendi a fai sa spesa. Giuliu: Poita ca est prondi. Amalia: E ita c’intrat si est proendi? Giuliu: A su mancu mi sciacu sa conca in giru, e arresparmiaus puru s’àcua! ………………………………………………………………………………………………………………………………………………………Una rana est sètzia in bicicletta pasiendusì
Sa rana: Imoi ca mi seu pasiada, incapas mi fatzu un atru bellu Girinu! ..........................................................................................................................................................Sofia est impari cun su piciocu sderrigaus in su divanu
Sonia: Ti biu pensierosu. A ita ses pensendi. Su piciocu: A su chi ses pensendi tui. Sonia: As intzertau! Ddai ca si spollaus! ...........................................................................................................................Pillimu est in su bar bufendi cun Astolfu
Astolfu: Nara, ma tui ses de acòrdiu po sa paridadi tra fèminas e òminis. Pillimu: Certu. Ca seu de acòrdiu. A su mancu pobidda mia, dda smittit de mi cumandai! .................................................................................................................................................Unu cundannau a sa “sedia elettrica” tzèrriat a su boia
Su Cundannau: O su Boia, acrutziadì, ca ti depu pedì una cosa. Su Boia: Ita bolis? No tengas pressi, ca non est ancora ora, po s’esecutzioni. Su Cundannau: Ge ddu sciu, porca boia. Ma est ca chi po prexeri, podiasta serrai cussa ventana, ca intrat tropu currenti! ............................................................................................................................................................Duus sitzìgorrus funt in su marciapiedi
Su primu sitzìgorru: Dai a lestru, ca atraversaus sa strada. Susegundu sitzìgorru: Ma ita ses macu! Ita ti bolis fai strecai! La ca tra duas oras, depit passat sa processioni! ................................................................................................................................................................Unu para est bussendi a su portoni de su paradisu
Su Para: Est permesso? Su Portinàiu: Chi est bussendi? Su Para: Seu unu Cappuccinu. Su Portinàiu: Nemus at ordinau Cappuccinus. Andissindi a lestru! Innoi bufaus scèti latti sene cafei!© Riproduzione riservata